Масжиднинг таҳоратхонасига ARISTON оберамиз, мактаб ҳожатхонасига эса биттагина обдаста обермаймиз (ёхуд 5 та жўмрак қўйилган ҳожатхона сув кранининг 4 таси йиллаб ишламайди, болаларга бўлаверади. Комиссия келганда ишласа бўлди…)
Тўйларда артистларга пул сочамиз, синфга парда деса, жонимиз чиқади!
Ишхонада банкет бўлса ходимларга «эриймиз», мактабдаги тадбирга келганда ўша куни ишимиз чиқиб қолади!
Тўй қилсак, қўшни қишлоқдаги бойлар ҳам айтилиб, кечгача кетказмай меҳмон қиламиз, фарзандимизнинг ўқитувчиси эса эсимиздан чиқиб қолади!
Маҳаллада битта бой машина олса, “қандини урсин” деймиз-у, ўқитувчи олса “шартмикин, қорнига емасдан машина олиш” деб ижирғанамиз!
Йилда бир марта ремонтга, обунага пул йиғилса “закон”чилигимиз тутиб қолади, лекин битмаган ишни “соққа”сини бериб битириб, қонунни оёқости қиламиз!
Кунда-кунора ошналарни, ишимиз тушган одамларни чойхонага оборамиз, аммо ўқитувчини бир марта меҳмон қилмаганмиз!
Менга нима хизмат буюраркан деб, бошлиғимизнинг оғзига қараб турамиз-у, лекин ўқитувчи муаммодан гапирса, оғзига урамиз!
Лекин ЎҚИТУВЧИ бировнинг мурувватига ёки пулига муҳтож эмас! Озгина ҚАДР ва ЭЪТИБОР топса, шунинг ўзи кифоя!
Дафтарга, ремонтга, обунага, металломга, гулларга, пардага ва бошқа чиқимларга йиғилган пул нимаям бўларди! Наҳот, шу пулга қараб қолган деб ўйласак, ЎҚИТУВЧИни. Азбаройи касбини севганидан ёки шунча йиллик билими увол бўлмаслиги учун ишлаяпти ЎҚИТУВЧИ. Унутманг, устоз отадай улуғ!
Мақсуд Жонихонов
