Кинематография агентлиги томонидан эълон қилинган “Сени соғиндик баҳор” шиори остида “Кинокарвон” акциясига старт берилди.
Кино ойлик, “Киночилар уйида” бўлиб ўтадиган агентлик буюртмаси асосида ишлаб чиқарилган янги фильмларнинг премьералари ҳамда турли мавзудаги кино тадбирлар, давлат ва нодавлат телеканаллари орқали томошабинларга ҳавола этиладиган 30 дан ортиқ бадиий, ҳужжатли ва анимацион фильмлар намойиш этилади.
Илк манзил Наманган вилоятида бўлиб, ижодкорлар наманганлик киномухлислар билан учрашди ва самимий суҳбат қуришди. Томошабинлар эътиборига сўнгги йилларда суратга олинган “Ватан остонаси”, “Мерос” бадиий фильмлари намойиш этилди.
Яна бир гуруҳ киноижодкорлар самарқандлик киномухлислар билан учрашувларни бошлаб юборишди. Ўзбекистон халқ артисти Дилором Каримова, “Буюк хизматлари учун” ордени соҳибаси, Ўзбекистонда хизмат кўрсатган артист Гулчеҳра Саъдулаева, актёр ва режиссёрлар Умид Искандаров, Санжар Шодиев, ўзбек киносининг “Кичкина табиб”и, актёр Дилшодбек Каттабеков каби ижодкорлар иштирокидаги бундай дийдорлашув самарқандликларда катта таассурот қолдирди.
Шунингдек, ўзбек кино ижодкорларининг ижод маҳсуллари бўлмиш “Самарқандда қовун таровати”, “Қуёш таъми” каби фильмлар йиғилганлар эътиборига ҳавола қилинди.
