2021 йил Самарқандда бўлиб ўтган сайловолди учрашувда Президент Шавкат Мирзиёев Регистон мажмуасидаги «Тиллакори» ва «Шердор» мадрасалари қурилишини ташкил этган тарихий қаҳрамонларимиз ҳақида фильм яратиш ғоясини берган эди.
Айни кунларда “Ўзбекфильм” ижодкорлари ушбу ғоя устида иш олиб бормоқдалар.
Самарқанд шаҳридаги “Шердор” ва “Тиллакори” мадрасаларининг қурилишига сабабчи бўлган Баҳодир Ялангтўш ҳақида тарихий ўзбек киноси суратга олинмоқда. Фильм режиссёри Жаҳонгир Аҳмедов. Сценарий муаллифи Ҳасан Тошхўжаев.
“Баҳодир Ялангтўш” фильми Ўзбекистон Республикаси Кинематография агентлиги, Самарқанд вилояти ҳокимлиги ва “EZGU FILM” студияси билан ҳамкорликда олинмоқда. Режага кўра, суратга олиш жараёнлари 2023 йилнинг баҳор ойларида якунланиши керак. Картинанинг умумий бюджети 30 млрд. атрофида. Шу кунга қадар фильмга 17 млрд. сўм маблағ ажратилган. Маблағнинг асосий қисми техника ва либослар учун кетди.
Фильмда – Баҳодир Ялангтўш, Имомқулихон, Назр Муҳаммад, Нодир Девонбеги, Абдулазизхон, Меъмор Абдужаббор, Бойбек-Ялангтўш ўғли каби образлар бор. Ҳар бир қаҳрамон тақдири бир-бири билан узвий боғлиқ. Мисол учун: Нодир Девонбеги кўп йиллар давомида саройда юқори лавозимларда ишлаган ва у уч подшоҳнинг фаолиятига гувоҳ бўлган. Унинг фарзанди бўлмаган шунинг учун умрининг охирларида давлат ишидан кетиб, бор бойлигига масжид ва мадрасалар қурдиради. Умрининг сўнгги кунларида “Менинг фарзандларим шу бинода таҳсил олганлар. Улар мени дуосида эслаб қўйса бас”, дейди. Олимларнинг таъкидлашича, Регистон майдонидаги “Шердор” ва “Тиллакори” мадрасалари пештоқида араб тилида ёзилган сўзлар охирга Меъмор Абдужаббор исми ҳам ёзилган экан. У киши Баҳодир Ялангтўшнинг меъмори бўлган экан.
Янги панорамали павильон энг юқори замонавий ва технологик савияда фильмлар суратга олишга мўлжалланган. Агар илгари йирик блокбастерлар ва жанговар картиналар хромакей ёрдамида суратга олинган бўлса, бугун Stage Craft технологиясидан фойдаланиш билан ҳаммаси глобал миқёсда ўзгаради. Технология битта павильоннинг ўзида юқори сифатли тасвирни олиш имконини беради. Натижада виртуал оламнинг юқори сифатли тасвири LED экранда акс эттирилади.
Бойсафар ХОЛМИРЗАЕВ
