Фильмни томоша қилиб беихтиёр унинг кўринмас қаҳрамонига айланиш! Завқли-а?.. Мен ҳар сафар ўзимизнинг “Суюнчи”, “Маҳаллада дув-дув гап”, “Ўткан кунлар”, “Ёр-ёр”, фильмларимизни кўрганимда шундай кўринмас қаҳрамонга айланаман. “Тўйлар муборак”ни олайлик… Куёвнинг алебастрда қотиб қолган оёқлари, кампирнинг пенсияси, келиннинг “кундоши”, дорбоз қизнинг қайсарлиги, чўкиб кетишига бир баҳя қолган куёвжўра… Эҳ-ҳей, битта кинода шунча эсдалик бор.
“Тўйлар муборак” фильми 1978 йилда режиссёр Эдуард Хачатуров томонидан суратга олинган. Аслида кино “Шаҳарни сенга совға қиламан” деб номланган. Кейинчалик “Тўйлар муборак”ка айланган. Сценарий муаллифи Ўзбекистон халқ ёзувчиси Саид Аҳмад. Картинанинг давомийлиги 65 дақиқа! Фильмда Ўзбекистон халқ артистлари Ғани Аъзамов, Раззоқ Ҳамроев, Икрома Болтаева, Лола Бадалова, Сойиб Хўжаев каби ўз касбининг усталари катта-кичик ролларда намоён бўлган. Бош ролларни Ўзбекистон халқ артистлари – Обид Юнусов ҳамда Гавҳар Зокирова ижро этган.
